Немаше претрес, велат од Судскиот совет на Република Северна Македонија, демантирајќи ги наводите за извршен претрес во нивните простории.
„Судскиот совет на Република Северна Македонија по повод пласираните информации во јавноста за наводен „извршен претрес“ во просториите на Советот во текот и по завршувањето на работното време, ја информира јавноста дека по примени писмени барања на ОЈО Скопје, Судскиот совет на РСМ постапи по истите. Нагласуваме дека не е издадена наредба за претрес, ниту е извршен претрес во просториите на Судскиот совет на РСМ“, стои во соопштението од Судски совет.
Истакнуваат дека постапиле по писмените барања на Основното јавно обвинителство (ОЈО) Скопје и дека ќе продолжат да соработуваат со сите надлежни органи, како и дека се оградуваат од какви било влијанија и притисоци одвнатре и однадвор, а со цел заштита на независноста и интегритетот на судството.
Како што потврди Јавното обвинителство претходно, полициски службеници по наредба на Основното јавно обвинителство (ОЈО) Скопје вчера влегле во Судскиот совет за да ги обезбедат записниците во врска со сомнежите за евентуално сторено кривично дело поврзано со мандатот на претседателката на Судски совет, Весна Дамева, која поднесе оставка на 2 декември.
Министерството за внатрешни работи (МВР) за МИА денеска потврди дека, а бараните два записници кои треба да се проверат се одземени.
Претседателката на Судскиот совет, Весна Дамева, рече дека причината за нејзината оставката е недостатокот на поддршка и обидите за нарушување на нејзиниот интегритет од страна на високи функционери.
