Романскиот екстремно десничарски, проруски претседателски кандидат Калин Георгеску и десетици негови поддржувачи протестираа на затворено избирачко место во Букурешт, откако Уставниот суд на Романија ги поништи претседателските избори поради обвинувања за руско мешање.
Судот ја донесе одлуката на 6 декември, велејќи дека владата сега мора да одлучи кога ќе се одржат нови избори.
Повеќе од 100 луѓе се собраа пред избирачкото место во главниот град на 8 декември, првично закажаниот датум за вториот круг гласање - извикувајќи „Долу диктатурата“, „Сакаме да гласаме“ и „Крадци“.
Георгеску, чии проруски коментари предизвикаа протести на илјадници претежно млади Романци во последниве денови, рече дека властите ги откажале изборите бидејќи се плашеле дека тој ќе победи.
„Јас сум овде во име на демократијата и секогаш ќе бидам“, изјави Георгеску пред гласачкото место.
Георгеску, кој се кандидираше како независен кандидат, победи во првиот круг од изборите на 24 ноември, пред проевропската центристичка кандидатка Елена Ласкони од централнодесничарската партија „Спасете ја романската унија“.
Но, Уставниот суд во својата одлука за поништување на изборите наведе нелегална употреба на дигитални технологии, вклучително и вештачката интелигенција, како и употреба на „непријавени извори на финансирање“.
Георгеску ја отфрли пресудата како „официјален пуч“ и напад врз демократијата, додека Ласкони, исто така, ја осуди одлуката.
Вториот круг на претседателските избори во Романија се сметаше за референдум за идната насока на членството во НАТО и ЕУ поради обвинувањата за руско мешање што извади илјадници Романци на улиците во знак на поддршка дека местото на земјата е во евроатлантската заедница.
Романскиот проевропски претседател Клаус Јоханис изјави дека ќе остане на функцијата се додека не се формира нова влада, која ќе одреди датум за претседателски избори.
Се очекува тој да назначи премиер кој ќе формира влада од парламентот што беше избран на 1 декември. Таа администрација треба да одреди датум за нови избори.
