Шефот на НАТО, Марк Руте, ја опиша како „длабоко загрижувачка“ ситуацијата во Грузија каде што десетици луѓе беа повредени во деновите на антивладините протести на прозападните демонстранти.
„Извештаите за насилство се длабоко загрижувачки и јас недвосмислено ги осудувам“, рече Руте на прес-конференција.
Тој додаде дека сојузниците во НАТО „ја повикуваат грузиската влада да остане на патот“ кон „поголема интеграција во ЕУ и НАТО“.
Грузиската претседателка Саломе Зурабишвили синоќа (2 декември) изјави дека целата земја е во „бунт“ откако полицијата четврта ноќ по ред ги тепаше и насилно ги растера демонстрантите во главниот град Тбилиси кои протестираа против плановите на владата да ги прекине преговорите за пристап во ЕУ до 2028 година.
Полицијата употреби водени топови и солзавец за да ги смири протестите во близина на зградата на парламентот, при што во раните утрински часови во понеделникот апсеше и демонстранти.
Досега, според извештаите, се уапсени најмалку 200 лица.
Грузија влезе во политичка криза по парламентарните избори во октомври, на кои владејачката партија Грузиски сон освои 54 отсто од гласовите, додека опозицијата и западните влади тврдат дека изборите биле нарушени со нерегуларности и руско влијание.
Минатата недела новоизбраниот парламент распиша индиректни избори за избор на нов претседател на 14 декември. Мнозинството Грузијци го поддржуваат членството во Европската Унија, а напорите за влез во Унијата се составен дел и од Уставот на оваа земја.
Соединетите Држави во јули објавија дека ќе ја прекинат помошта од над 95 милиони долари за грузиската влада, предупредувајќи дека земјата е во демократски пад. На 28 ноември, Европскиот парламент усвои резолуција со која повика на нови парламентарни избори во Грузија и санкции против високи членови на партијата Грузиски сон.
