Министерот без ресор во Владата на Црна Гора во техничкиот мандат, Адријан Вуксановиќ, денеска поднесе оставка.
Вуксановиќ, кој е и лидер на Хрватската граѓанска иницијатива (ХГИ), рече дека тоа го прави по настаните во Собранието на Црна Гора на 21 октомври и, како што наведе, незаконското разрешување на министрите за одбрана и за надворешни работи Рашко Коњевиќ и Ранко Кривокапиќ.
„Коњевиќ и Кривокапиќ беа разрешени бидејќи ги бранат интересите на Црна Гора и ги застапуваат темелните вредности на кои почива нејзината државност“, рече Вуксановиќ и додаде дека тоа се интереси и на хрватската заедница во Црна Гора.
Црногорскиот парламент разреши двајца министри од преодната влада на Абазовиќ
Собранието на Црна Гора на 21 октомври ги разреши министерот за одбрана Рашко Коњевиќ и министерот за надворешни работи Ранко Кривокапиќ.
Министрите беа сменети на предлог на црногорскиот премиер во технички мандат, Дритан Абазовиќ, кој во своето образложение изјави дека од изгласувањето недоверба на неговата Влада на 19 август, јавните постапки на Коњевиќ и Кривокапиќ континуирано отстапуваат од официјални позиции на Владата.
Абазовиќ во своето образложение додаде дека нивното раководење со ресорите за одбрана и за надворешни работи во голема мера ја отежнувало работата на 43-та Влада до изборот на нова Влада.
