Новата верзија на бомбардерот Ту-160 доаѓа за четири години
За четири години почнува сериското производство на новата верзија на бомбардерот Ту-160. Ова на авиосаемот МАКС-2017 го изјави заменик-министерот за одбрана на Русија Јуриј Борисов.
„За почетоткот на 2018 година е планиран првиот лет на авионот во новиот облик, од 2021 година почнува сериското производство по 3-4 авиони годишно. Планираме да купиме околу 50 авиони од оваа марка”, рече Борисов, пренесува „Лента.ру“.
„Белиот лебед“: Новиот „преоден“ стратешки бомбардер
Претходно на 11 јули беше соопштено дека првиот авион од типот Ту-160М2 стигнал во одделот на фабриката за склопување во Казањскиот завод за производство на авиони.
Ту-160М2 претставува коренита модернизација на основниот проект на суперсоничниот стратешки бомбардер Ту-160. Главната разлика ќе биде во системот за радио-електронско војување. Модернизираниот авион ќе има 60% нови делови. Исто така, авионот ќе добие нови авијациски офанзивни средства.
Суперсоничните стратешки бомбардери-носачи на ракети Ту-160 влегоа во состав на стратешката авијација на Русија во 1987 година. Леталото со маса до 275 тони при полетување развива максимална брзина поголема од 2000 километри на час и може да носи до 40 тони борбен товар.