7-январь күнү саат 20:00 чамасында Кадамжай району аркылуу өткөн Ош-Баткен-Раззаков автоунаа жолунун 131-чакырымында эки машине кагышкан. Баткен облустук ички иштер башкармалыгы маалымдагандай, кырсыктын кесепетинен 50 жаштагы аял каза болду.
Маалыматка ылайык, кырсык жолдун Кадамжай районундагы Исхак Полотхан айылындагы тилкесинде болгон. Кырсыкка "Хундай-Соната" үлгүсүндөгү автоунаа каршы тилкеге чыгып, каршы багытта келе жаткан "Фольсксваген-Гольф-3" үлгүсүндөгү машине менен сүзүшкөнү себеп болгон.
Кырсыктын кесепетинен "Фольксваген-Гольф-3" автоунаасынын 50 жаштагы жүргүнчүсү Кадамжай райондук ооруканасында көз жумган.
Айдоочулар жана башка жүргүнчүлөр жаракат алып, Кадамжай райондук ооруканасынын сыныктар бөлүмүнө жаткырылган. Бул факт Кадамжай райондук ички иштер бөлүмүндө (РИИБ) катталып териштирүү иштери жүргүзүлүүдө.
Жол кыймылынын коопсуздугун камсыздоо башкармалыгынын (ЖКККБ) маалыматына караганда, былтыр 11 айда өлкөдө 6 миңден ашуун жол кырсыгы катталган. Андан 640 адам каза болуп, дагы 9 миңге жакын киши жаракат алган. (JsA/ZKo)
