Бишкектеги Республикалык клиникалык жугуштуу оорулар ооруканасында ушул күндөрү 606 бейтап дарыланып жатат. Бул тууралуу сөз болуп жаткан оорукананын башкы дарыгеринин орун басары Нургүл Молдалиева “Биринчи радионун” эфиринде айтты.
Анын сөзүнө караганда, Республикалык клиникалык жугуштуу оорулар ооруканасы 500 гана бейтапка ылайыкташкан, бирок кайрылгандар көп болгондуктан адамдар коридорлорго да жайгаштырылууда. Акыркы бир сутканын ичинде 317 киши кайрылып, анын 123ү ооруканага жаткырылды. Алардын ичинен 114ү балдар, 9у чоңдор.
“Ооруканада жаткандардын көбү курч респиратордук вирустук инфекция менен жабыркагандар. Андан кийин кызамык, көк жөтөл жана башка илдет менен ооругандар бар”, - деди ал.
Республикалык клиникалык жугуштуу оорулар ооруканасына кайрылган бейтаптар ушул жылдын башынан тартып көбөйүп, узун кезек пайда болгон.
Саламаттык сактоо министри Алымкадыр Бейшеналиев курч респиратордук вирустук инфекциялардын (КРВИ), сасык тумоонун жана башка жугуштуу оорулардын сезондук өсүшүнө байланыштуу билдирүү таратып, жарандарды ден соолугуна көңүл бурууга жана ооруну алдын алууга чакырган. Ал бейтаптарды биринчи ирет Үй-бүлөлүк медицина борборлоруна кайрылууга үндөгөн. (BTo)
