АКШнын Конгресси дүйшөмбүдө президенттик шайлоонун жыйынтыгын бекитүү жараянына чогулат. Ошону менен республикачылар Дональд Трамп менен Жей Ди Вэнстин жеңишин расмийлештирилет. Адатта добуштарды бышыктоо формалдуу процедура болот. Жыйында ар бир штаттын шайлоочулар коллегиясынын добуш берүүсү тууралуу маалымат берилет. Бирок мындан төрт жыл мурунку окуялардан улам Вашингтондо коопсузудук чаралары күчөтүлдү. Президент Жо Байден 2021-жылдын 6-январында болгон окуялардын кайталанышына жол бербесин билдирди.
Ал жылы Жо Байдендин жеңишин тастыктоо учурунда Трамптын агрессивдүү тарапкерлери Капитолийге кирип барып, жараянды үзгүлтүккө учуратууну көздөгөн. Трамп Байдендин жеңишин эч качан тааныган эмес жана колдоочуларын шайлоонун чыныгы жыйынтыгын орнотуу үчүн күрөшкөнүн айтканы менен Конгресс отурган имаратка кол салууга түздөн-түз тукурган эмес.
АКШнын бийлиги ал окуяны көтөрүлүш катары сыпаттаган. Кагылышууларда бир нече киши каза тапкан. Шайлоонун жыйынтыгы бир нече сааттан кийин бекитилген. Трампка импичмент жарыяланып, кийин Сенат ага күнөө тагуудан баш тарткан. Жүздөгөн киши соттолду.
Саясат талдоочулар бул ирет жараян тынч өтөрүн белгилешет. Демократтар Трамптын жеңишин тааныган. Анын үстүнө республикачылар Конгресстин эки палатасында тең көпчүлүктү түзөт.
Конституцияга ылайык, добуштарды тастыктоо жараянына төргалык кылуу вице-президентке жүктөлөт. Башкача айтканда быйыл нобярдагы шайлоодо Трампка утулуп калган Камала Харрис шайлоонун жыйынтыгын бекитет.
Трамп 20-январда ант берип кызматына расмий киришмекчи.
