Финансы министрлиги январь айында 4,7 млрд сомдук мамлекеттик казыналык облигацияларды чыгарат. 2025-жылы жалпысынан 34 млрд сомдон ашуун баалуу кагаз чыгаруу пландалган. Улуттук банк жарыялаган маалыматка ылайык, январда сатылчу казыналык облигациялар үч бөлүк менен чыгарылат.
Аукциондун күнү
Чыгаруу күнү
Купондун үстөгү
Мөөнөтү
Баалуу кагаздын көлөмү
10.01.2025
13.01.2025
5%
3 жыл
800 млн сом
17.01.2025
20.01.2025
7%
7 жыл
1 млрд 700 млн сом
24.01.2025
27.01.2025
8%
10 жыл
2 млрд 200 млн сом
Расмий жарыяланган маалыматтарга ылайык, ички карыз 2023-2024-жылдары эки эсе өсүп, 145 млрд сомго жеткен. Адатта өкмөт калктан алган карызды бюджеттин дефицитин жабууга, мамлекеттик ишканалардын карыздарын төлөөгө, түрдүү долбоорлорду каржылоого жана башка чыгымдарга жумшайт.
2023-жылы өкмөт жалпы 38 млрд сом ички карыз алган. Эң популярдуу 7 жана 10 жылдык облигациялар 15-16% үстөк менен сатылган.
Өкмөт 2025-2027-жылдары жыл сайын 34 млрд сомго баалуу кагаздарды чыгарууну пландап жатат. Башкача айтканда, мамлекет үч жылда калктан 100 млрд сомдон ашуун карыз алат.
Калктан карыз алуу үчүн Каржы министрлиги вексел жана облигация деген баалуу кагаздарды чыгарат. Айырмасы - вексел 1 жылга, облигация 2 жылдан 20 жылга чейинки мөөнөткө сатылат. Мамлекет баалуу кагаздарды сатып алган тарапка үстөк кошуп кайтарып берет. (KbA)
