Кыргызстандын Тышкы иштер министрлигинин маалыматына караганда, жол кырсыгы 31-декабрда Орусиянын Оренбург облусунун Бузулук районундагы Алдаркино айылынын жанында болгон. Баштапкы маалымат боюнча, Chevrolet Cruze үлгүсүндөгү автоунаанын айдоочусу каршы тилкеге чыгып, унаа ташыган машинаны сүзгөн.
Министрлик Орусиянын компетенттүү органдарынан алынган маалыматка таянып кырсыктын кесепетинен Кыргыз Республикасынын төрт жараны каза болгонун кабарлады.
"1976-жылы туулган Р.Н., 1982-жылы туулган Б.Т., 1986-жылы туулган Д.А., 1990-жылы туулган С.Н. каза болуп, жашы жете элек бир бала жаракат алган жана Бузулук шаарынын ооруканасына жеткирилген" деп айтылды маалыматта.
Окуя боюнча иликтөө башталды. Тышкы иштер министрлиги элчилик Орусиянын укук коргоо органдарынын өкүлдөрү жана медицина кызматкерлери менен байланышканын маалымдады.
Расмий маалыматка караганда, 2024-жылдын алгачкы алты айында чет өлкөлөрдө каза болгон 262 кыргыз жаранынын сөөгү мекенине жеткирилген. "Жүк 200" алып келүүгө мамлекет 23 млн 260 миң сом төлөп берген.
2023-жылы чет өлкөлөрдөн 581 ашык кыргызстандыктын сөөгү мекенине алынып келинген, алардын басымдуу бөлүгү Орусия, Түркия, Индия, АКШ жана Казакстандан жөнөтүлгөн. (AiA)
