Коомдук ишмер Орозбек Дүйшеевдин сөөгү 28-декабрда жерге берилди. Ал Бишкектеги үйүнөн узатылып, сөөгү "Ала-Арча" көрүстөнүнө коюлду.
Орозбек Дүйшеев 27-декабрь түндө, 93 жашында дүйнөдөн кайткан.
Кыргыз Республикасынын өнөр жай тармагынын Эмгек сиңирген кызматкери, Жогорку Кеңештин мурдагы депутаты, геолог Орозбек Дүйшеев 1932-жылы, 1-апрелде Талас облусунун Көк-Таш айылында туулган.
1955-жылы Москвадагы Тоо-кенчилер институтун аяктаган.
Эмгек жолун Кызы-Кыядагы көмүр шахтасында баштап, өмүрүнүн дээрлик бардык учурун тоо-кен тармагына арнаган. Бул тармакта жетекчилик кызматтарды аркалап жүрүп, 2000-2005-жылдары Коммунисттер партиясынан Жогорку Кеңешке депутат болгон.
Өмүрүнүн аягында Кыргызстандагы Коммунисттер партиясынын бюро мүчөсү, Тоо-кенчилер ассоциациясынын жетекчиси, Геология жана минералдык ресурстар боюнча мамлекеттик агенттиктин байкоочу кеңешинин төрагасы болуп турган.
II жана III даражадагы Манас ордендеринин ээси. Дагы башка бир катар мамлекеттик сыйлыктар менен сыйланган.
"Кыргызстандын өнөр жай тармагынын Эмгек сиңирген кызматкери", "СССРдин Приборкуруусунун отличниги" сыйлыктарын алып, Кыргызстандын Инженердик академиясынын академиги болгон.
