Бишкек шаардык ички иштер башкармалыгынын басма сөз кызматы “Азаттыктын” кабарчыларынын милиция бөлүмүнө жеткирилген себеби тууралуу билдирүү таратты.
Анда Бишкек шаарынын Октябрь райондук соту 4-августта чыгарган чечимге ылайык митинг, нааразылык акцияларын, пикеттерди жана жөө жүрүштөрдү өткөрүүгө чектөө бар экени белгиленип, 23-декабрда Жазаларды аткаруу кызматынын №21 түзөтүү мекемесинин жанында топ адамдын катышуусунда сот чечимин бузуу менен нааразылык акциясы өткөнү маалымдалат.
“Аталган факт Бишкек шаарынын Октябрь райондук ички иштер бөлүмүндө катталып, тергөө иштери башталган. Алдын ала текшерүүнүн алкагында Октябрь райондук ИИБдин кызматкерлери тарабынан акциянын катышуучулары, ошондой эле "Азаттык Медианын" журналисттери жеткирилип, түшүндүрүү иштери жүргүзүлдү жана бардыгы коё берилди”, – деп айтылат милициянын маалыматында.
“Азаттыктын” кабарчысы Максат Кутманбеков менен оператору Нурлан Бейшебаев 23-декабрда Бишкектеги №1 тергөө абагынын (расмий аталышы №21 тергөө изолятору) алдына чогулган камактагылардын жакындарын тартып жаткан маалда милиция кызматкерлери келип, алып кеткен.
Укук коргоо кызматкерлери чогулган адамдардын биринен алынган интервьюнун видеосун берүүнү талап кылышкан. Бөлүмгө жеткирилген соң алар ушул эле талабын кайталаган. Адвокаттын кийлигишүүсүнөн кийин журналисттер окуя жөнүндө түшүнүк кат жазып берип, андан соң бөлүмдөн чыкты.
Тергөө абагынын алдына чогулган камактагылардын жакындары Жаза аткаруу мамлекеттик кызматынан абактардагы абал боюнча түшүндүрмө талап кылышты. Он чакты тургун абакта жаткан жакындары сабалганы тууралуу маалымат алышканын, алардын абалына тынчсызданып жатканын билдиришти.
Мунун алдында бир катар басылмалар ЖАКтын жетекчиси алмашканына каршылык иретинде абакта камалган адамдар ачкачылык жарыялаганын жазышкан. Мекеменин басма сөз кызматы абакта камалган адамдар жапырт ачкачылык кармаганы жана абактагылар сабалганы тууралуу маалыматты төгүндөдү.
Юстиция министрлигине караштуу Жаза аткаруу кызматынын (ЖАК) төрагасы Аскат Эгембердиев 18-декабрда кызматынан кетип, Министрлер кабинетинин төрагасы анын ордуна Чыңгыз Кожошевди жетекчи кылып дайындаган.
Расмий маалыматка ылайык, Чыңгыз Кожошев 2023-жылдан бери Ош шаарындагы Жаза аткаруу кызматына караштуу №25 (СИЗО-5) мекеменин жетекчиси болуп иштеп келаткан. Ага чейин Ички иштер министрлигинде (УКМК) жана Улуттук коопсуздук боюнча мамлекеттик комитетте (УКМК) эмгектенген. (ErN)
