Чүйдүн Москва районунун 30 жана 35 жаштагы эки тургуну кыз ала качууга шектелип кармалды. Бул тууралуу Чүй облусунун ички иштер башкармалыгы кабарлады.
20-декабрда Аламүдүн милициясына 20 жаштагы кыз 18-декабрда аны бейтааныш эки киши Васильевка айылынан күчтөп машинеге салып, ала качып кеткенин айтып, арыз менен кайрылган.
Тергөөдө шектүүлөр кызды Маевка айылына алып барып, молдого нике кыйдырууга аракет кылганы аныкталган. Кыз турмушка чыгуудан баш тарткандан кийин Беловодск айылына алып барып, үйдө күчтөп кармап турушкан.
Милиция шектүүлөрдү аныктап, убактылуу кармоочу жайына камакка алды. Учурда Кылмыш жаза кодексинин 172-беренеси (“Никеге туруу максатында ала качуу”) боюнча иш козголуп, тергөө жүрүп жатат.
Декабрь айынын башында Чүйдүн Жайыл районундагы "Сосновка" өткөрмө бекетинен кыз ала качууга шектелип 28 жаштагы эки, 30 жаштагы бир киши кармалган.
Кыргызстанда кыз ала качуу - оор кылмыш. Мындай кылмышы далилденгендер Кылмыш-жаза кодексинин “Никеге туруу максатында ала качуу” беренесинин биринчи бөлүгү (“Никеге туруу үчүн адамды ала качуу”) менен беш жылдан жети жылга чейин, экинчи бөлүгү (“Кыз баланы иш жүзүндөгү нике мамилелерине туруу же болбосо никеге туруу үчүн ала качуу”) менен жети жылдан он жылга чейин абакка кесилет. Ала качуунун айынан кыздардын өмүрү кыйылган учурлар катталган. (TSh)
