Франциянын соту жубайына дары сайып, чочун кишилерди чакырып аны зордуктаткан Доминик Пеликону 20 жылга абакка кести. Бул тууралуу Associated Press жазды. 72 жаштагы Пелико ага тагылган бардык айыптар боюнча күнөөлүү деп табылды. Ал өзү жана аялы Жизелди зордуктаган бир нече киши күнөөсүн моюнга алды.
Бардыгы болуп бул иш боюнча 51 киши өткөн. Он жыл бою түрдүү жаштагы, түрдүү улуттагы жана ар кандай кесипти аркалаган эркектер Пеликонун үйүнө барып, уктап жаткан аялды зордуктачу. Күйөөсү анын бардыгын видеого тартып алган. Жубайлар 50 жыл никеде турган. Кылмыштын бети ачылгандан кийин аялы ажырашып, кайра өзүнүн фамилиясына өткөн.
Калган айыпталуучулар 3 жылдан 15 жылга чейин эркинен ажыратылды.
2020-жылы Пелико дүкөндө аялдарды жашыруун тартып жатканы үчүн кармалганда полиция анын үйүнөн жогоруда айтылган видеолорду таап алган. Аларда аялын 72 киши зордуктаганы көрүнүп турганы менен, бардыгын аныктоо мүмкүн болгон эмес.
Жизель Пелико бетин, аты-жөнүн жашырбай ачык сотко катышууну чечкен. Бул окуядан кийин Францияда аялдардын коопсуздугу тууралуу маселе козголду. 14-сентябрда Жизелге тилектештик билдирген акция өткөн.
Авиньон шаарындагы сот болгон имараттын алдына активисттер “Жизель, рахмат!” деген плакатты кармап турду.
