АКШнын шайланган президенти Дональд Трамп Кытайдын лидери Си Цзинпинди жана чет өлкөлүк башка жетекчилерди инаугурациясына чакырды. Бул тууралуу Трамптын өткөөл убакыттагы басма сөз катчысы Каролин Ливитт Fox News телеканалына берген маегинде айтты.
Ага чейин CBS өз булактарына таянып, Кытай лидери 20-январдагы салтанатка чакырылганын маалымдаган. Кабарда айтылгандай, чакыруу ноябрда, президенттик шайлоодон кийин көп узабай жөнөтүлгөн. Си Цзинпиндин чакырууну кабыл алганы же албаганы азырынча түшүнксүз.
АКШ президентинин ант берүү аземине адатта элчилерди, башка дипломаттарды чакырышат. CBS News Мамлекеттик департаментке шилтеме менен берген маалыматка ылайык, 1874-жылдан бери бир да чет өлкөлүк лидер инаугурацияга катышкан эмес.
Трамп президент болуп турган кезинде Кытай менен соода согушун жүргүзүп келген. Быйыл 26-ноябрда кызматка кирешери менен АКШга келген кытайлык бардык товарларга салыкты көтөрөрүн жана кошумча тарифтерди киргизерин билдирген.
Бул чечимди комментарийлеп жатып, Бээжиндин өкүлү соода согуштарында жеңүүчү болбосун, “дүйнө андан утпай турганын” айткан.
Тараптардын соода согушу 2018-жылдын башында башталган.
Вашингтон Бээжин бийлигин протекционизм үчүн жана бизнести адилет жүргүзбөйт деп күнөөлөп, Трамп бир катар Кытайдын товарларына бажы төлөмүн киргизген. Бээжин дагы ушундай эле жооп кайтарган.
