"Дүйнөдөгү жана аймактагы кырдаалдын курчушу коопсуздук коркунучтары менен күрөшүүдө гана эмес, тынчтыкты жана туруктуулукту сактоодо да күч-аракеттерди бириктирүүнү талап кылат".
Бул тууралуу Кыргызстандын президенти Садыр Жапаров 28-ноябрда Астанада өтүп жаткан Жамааттык коопсуздук келишими уюмунун (ЖККУ) Жамааттык Коопсуздук кеңешинин чакан отурумунда билдирди.
Мамлекет башчы бул үчүн ЖККУга мүчө мамлекеттер бири-бири менен тыгыз аракеттенүүсү зарыл экенин айтып, чогуу уюмдун потенциалын бекемдөөдө олуттуу натыйжаларга жетишүүгө болорун белгиледи.
ЖККУнун чакан отурумунда эл аралык жана аймактык коопсуздуктун актуалдуу көйгөйлөрү, ошондой эле уюмдун ишмердүүлүгү талкууланды.
Быйыл Казакстан ЖККУда төрагалык милдетти аткарып жаткандыктан, уюмга мүчө мамлекеттердин башчыларынын саммити бул жолу Астанада өтүүдө. ЖККУ төрагалыгы 2025-жылы Казакстандан Кыргызстанга өтөт.
Астанадагы саммитке Беларустун президенти Александр Лукашенко, Казакстандын президенти Касым-Жомарт Токаев, Орусиянын президенти Владимир Путин жана Тажикстандын президенти Эмомали Рахмон катышты.
1992-жылы негизделген ЖККУнун курамында алты өлкө – Кыргызстан, Армения, Беларус, Казакстан, Орусия жана Тажикстан бар.
Армениянын премьер-министри Никол Пашинян быйыл 12-июнда Армения уюмдан чыгарын жарыялаган. Ал Азербайжан Тоолуу Карабакты көзөмөлүнө алган кезде жана эки өлкө ортосунда чек ара сүйлөшүүлөрү оңой эмес болуп жаткан чакта ЖККУга таяна албай койгонун бир нече жолу кайталаган. Бирикмеде үстөмдүк кылган Москва өз кезегинде Арменияны батышчыл позициясы үчүн айыптаган. (ZKo)
