28-ноябрда Астана шаарында өткөн Жамааттык коопсуздук келишими уюмунун (ЖККУ) Жамааттык коопсуздук кеңешинин саммитинде 14 документке кол коюлду. Бул тууралуу Кыргызстандын президентинин сайтына жарыяланды.
Кол коюлган документтердин ичинде Жамааттык коопсуздук кеңешинин декларациясы, уюмду мындан ары дагы чыңдоо, 1941-1945-жылдардагы согуштагы Жеңиштин 80 жылдыгын майрамдоо, уюмдун тажик-ооган чек арасын бекемдөө чечими жана башка протоколдор бар.
ЖККУга быйыл Казакстан төрагалык кылууда. 2025-жылы бул милдет Кыргызстанга өтөт.
1992-жылы негизделген ЖККУнун курамында алты өлкө – Кыргызстан, Армения, Беларус, Казакстан, Орусия жана Тажикстан бар.
Армениянын премьер-министри Никол Пашинян быйыл 12-июнда Армения Жамааттык коопсуздук келишим уюмунан (ЖККУ) чыгарын жарыялаган. Ал Азербайжан Тоолуу Карабакты көзөмөлүнө алган кезде жана эки өлкө ортосунда чек ара сүйлөшүүлөрү оңой эмес болуп жаткан чакта ЖККУга таяна албай койгонун бир нече жолу кайталаган. Бирикмеде үстөмдүк кылган Москва, өз кезегинде, Арменияны батышчыл позициясы үчүн айыптаган.(ZKo)
