Пенсионер Базарбай Темишов менен «Борбордук Азиядагы тынчтык жана ѳнүгүү институту» коомдук бирикмесинин төрагасы Бактыбек Жумагулов президенттик шайлоого катышуу үчүн Борбордук шайлоо комиссиясына (БШК) арыз беришти. Бул тууралуу Боршайкомдун басма сөз кызматы билдирди.
Ушуну менен 14-ноябрь саат 17:00гө карата Кыргызстандын президенти кызматына талапкерлигин көрсөтүү үчүн БШКга документ тапшыргандардын саны 51 адамга жетти.
Алардын арасында Жогорку Кеңештин азыркы жана мурдагы депутаттары, саясий ишмерлер, экономист, пенсионерлер жана президенттин милдетин аткарып жаткан өкмөт башчы Садыр Жапаров да бар.
Жалпысынан БШКга президенттин кызмат ордуна талапкер катары көрсөтүү жөнүндө 52 арыз түшкөн. Кийин Бакыт Бакетаев арызын чакыртып алды.
«Президентти жана Жогорку Кеңештин депутаттарын шайлоо жөнүндө» мыйзамга ылайык, президенттик кызматка талапкерлигин көрсөткөн жарандар БШКга документтерин 14-ноябрдын акырына чейин тапшырышы керек.
Кыргызстанда 4-октябрда кезектеги парламенттик шайлоо өтүп, анын бурмаланган жыйынтыгына нааразы болгон он чакты саясий партия 5-октябрда Бишкекте митинг өткөргөн. Митинг башаламандыкка айланып, ал окуя бийликтин алмашуусуна алып келген.
Сооронбай Жээнбеков 16-октябрда президенттик кызматын тапшырып берген. Президенттин милдетин элдик толкундоо убагында тарапкерлери түрмөдөн бошотуп алган Садыр Жапаров аткарып калган.
БШК мөөнөтүнөн мурдагы президенттик шайлоону келерки жылдын 10-январына белгилеген. (BTo)
