Ооган бийлиги 28-сентябрь, президентти шайлоо күнү Жалал-Абад шаарында коопсуздук чараларын күчөттү. Добуш берүү талибдердин чабуулунан жана шайлоо жыйынтыгын бурмалап коюу коркунучунан чочулоо менен жатат.
“Өлкө боюнча добуш берүү башталды. Адамдардын добушун берүү үчүн чоң кезек күтүп шайлоо участкаларына келгенине кубанып жатабыз”, - деди шайлоо комиссиясынын басма сөз катчысы Заби Садат.
Өлкө боюнча жалпысынан 5373 добушкана ишейт. Шайлоого 18 талапкер ат салышып жатат. Эгерде бир да талапкер жетиштүү добуш албай калса, шайлоонун экинчи айлампасы 23-ноябрда өтмөкчү.
Өлкөнүн түштүк тарабындагы Кандагар шаарында жооптуу кызматкерлер добуш берүү маалында жарылуу болгонун, ал районго “Тез жардам” машинасы жөнөтүлгөнүн билдиришти. Жарылуу боюнча мындан башка маалымат айтыла элек.
Шайлоо күнү коопсуздук күчтөрүнүн 72 миңдей кызматкери иштейт. 7 миң добушкананын эки миңге жакыны согушкерлердин ыктымал кол салуу коркунучунан улам жабылды.
Ооганстанда 2014-жылы өткөн соңку президенттик шайлоодо шайлоочулардын 60% катышкан. Анда да негизги кармаш Ашраф Гани менен Абдулла Абдулланын ортосунда болгон. Шайлоонун экинчи айлампасында Гани утуп чыкканда Абдулла аны «көз боёмочулук кылды» деп айыптап чыккан. Анын тарапташтары калайман нааразылык акцияларын өткөрүүгө убада берген.
Айрым байкоочулар "Талибан" кыймылы шайлоону утурлай чабуулду күчөткөндүктөн жана өлкөдөгү соңку жагдайдан улам жарандар добуш берүүгө барбай коюшу ыктымал экенин да айтып жатышат.
