Украинанын Коопсуздук кызматы Запорожьеде Орусиянын кызыкчылыгына тыңчылык кылган деген шек менен мурдагы полиция кызматкери кармалганын билдирди.
Маалыматка караганда, ал “чөлкөмдөгү социалдык, саясий жана экономикалык абал тууралуу маалымат чогултуп, Крымга утур-утур барып турган. Аннексияланган жарым аралда “маалыматтарды Орусиянын Федералдык коопсуздук кызматынын өкүлүнө” өткөрүп келген".
Мунун алдында, 18-июлда атайын кызмат Полтава облусунда ушундай эле шек менен мурдагы тартип коргоочу кармалганын билдирген. Экөөнүн тең аты аталган жок.
Орусия Крымды 2014-жылы оккупациялап алгандан кийин аннексиялаган. Ошол эле жылы кошуна өлкөнүн чыгышында козголоңго жем таштап, жикчилерди колдоого алган. Куралдуу жаңжал чыккандан бери 13 миңден көп киши өлдү.
