Бишкекте Жазуучулар союзунун жаңы төрагасын шайлоо учурунда 1990-жылдары жазуучуларга бөлүнгөн 50 млн. рубль каражаты боюнча маселе козголду. Союздун мүчөсү, акын, юрист Ахунбай Кошой учурдагы төрага Акбар Рыскуловго суроо берди.
- Жазуучулар союзу финансылык жактан кыйналып турган учурда формалдуу түрдө болсо дагы эмнеге ушул маселелер көтөрүлбөйт? Мисалы үчүн, биздин союзга караштуу “Нооруз” кафеси, “Арашан” чыгармачылык үйү жана Орусиядан бөлүнгөн, Жапониядан бөлүнгөн насыялар боюнча көп сөз болуп жатат. Эмне үчүн ушул беш жыл ичинде ушул каражаттар, имаратар боюнча маселе көтөргөн жоксуңар? Ушул имараттарды Атамбаев өзү менчиктештирип алып, бирок жазуучуларга бир тыйын да бөлүп берген жок. Эмне үчүн бул мүлктүн ээси катары Атамбаевге суроо берген жоксуңар? - деди ал.
Акбар Рыскулов бул суроого бир беткей жооп берүү мүмкүн эмес экенин, себеби ал кезде башка кишилер төрага болгонун айтты.
- Туура, биз да карашыбыз керек эле. Бирок беш жыл мурда Алмазбек Атамбаев президент болуп турган кезде ошол мүлктү кайтарып берүү боюнча кайрылуу жибергенбиз. Бирок беш жылдын ичинде ал суроолорго жооп болгон жок, мени ага киргизишкен да жок. Тынымсыз алмашкан өкмөттүн ар бирине айттым, бирок жыйынтык болгон жок. Эми азыр бул маселе Атамбаев бийликтен кеткенден кийин дагы көтөрүлүп жатат, - деди ал.
Мындан беш жыл мурда 7-каналга Москва шаарында берген жоопторунда мурдагы президент Аскар Акаев 1990-жылдары Орусия берген насыядан Жазуучулар союзуна 50 миллион рубль берилгенин билдирген. Ал акчаны маркум жазуучу Чыңгыз Айтматовго карматканын, ал болсо Алмазбек Атамбаевге өткөрүп бергенин, ошол боюнча акчанын дайыны чыкпай калганын айткан.
2016-жылы болсо “Ата Мекен” фракциясынын лидери Өмүрбек Текебаев басма сөз жыйынында “Алмазбек Атамбаев Жазуучулар союзунун 50 миллион рублинен сырткары ондогон гектар жерлерди, “Автомаш” заводун менчиктештирип алганына далилдер” бар экенин айткан.
Алмазбек Атамбаев болсо президенттиктен кеткенден кийин “Апрель” телеканалындагы маегинде бул дооматтарды четке каккан. Бул боюнча “Азаттык” да иликтөө жүргүзгөн эле.
Маалым болгондой, 50 миллион рублга Бишкектеги Токтогул менен Үмөталиев көчөлөрүнүн кесилишинде жазуучулар үчүн жети кабаттуу, көп батирлүү үй курулмак. (ErN)
Жазуучулар союзунунун төрагасын шайлоо учурунан тартылып жаткан видео.