Бирикменин "Төмөнтөн көз караш" деп аталган долбоору алкагында өлкөнүн үч аймагында изилдөө иштери жүрөт. Өкмөттүк жана эл аралык гранттык каражаттар аймактардагы ар бир жамааттарга, жарандарга кантип жетип жатканы, алардын социалдык абалын жакшыртууга канчалык өбөлгө түзүп жатканы жөнүндө сурамжылоо жүргүзүлөт.
Эл аралык бирикменин Кыргызстандагы өнөктөшү болгон "Бир дүйнө Кыргызстан" уюмунун маалыматы боюнча, долбоор март айында Жалал-Абад, Ош жана Ысык-Көл облустарында ишин баштайт.
Жалал-Абадда кен иштетүүдөн калган зыян калдыктардын кесепеттерин жоюудагы аткарылган иштер, Ош шаарынын четиндеги лөлү калкы жашаган "Жаңы-Кыштак" айылынын социалдык абалын жакшыртуу, ал эми Ысык-Көлдө экологияны сактоого багытталган долбоорлордун ишке ашуусу боюнча иликтөөлөр жүргүзүлөт.
"Төмөнтөн көз караш" долбоорунун максаты - өкмөт, жарандык коом, тобокелчиликке кабылган аймактардагы жергиликтүү бийлик жана эл аралык уюмдардын кызматташтыгын арттырып, биргеликте түрдүү кырсыктардын алдын алуу болуп саналат.(SA/ZKo)