Жалал-Абад облустук мамлекеттик телерадиокомпаниясы (ЖМТРК) каналдын директоруна байланыштуу айрым Интернет сайттарында чыккан макалаларга байланыштуу сотко жана Маалымат каражаттарынын үстүнөн түшкөн даттанууларды караган комиссияга кайрылат.
Алар "Nazar news", "chyndyk.kg", "racurs.kg" жана "mezgil news" сайттары.
ЖМТРКнын кесиптик кошуунунун төрайымы Гүлзина Мөндөеванын “Азаттык” билдиргенине караганда, 5-февралда Интернет басылмаларда "ЖМТРКнын кызматтык унаасын директор Союзбек Абдрасулов жең ичинен 20 миң сомго сатып жиберди" деген кабар чыккан.
-1991-жыл чыгарылган “Фольксваген Пассат” үлгүсүндөгү кызматтык автоунаа 2010-жылы сатып алынган. Мыйзамга ылайык, кызматтык унааны пайдалануу мөөнөтү - беш жыл. Баланста автоунаа турса жаңысын алууга мыйзам жол бербейт. Ошондуктан Маданият, маалымат жана туризм министрлигине кат жөнөтүлгөн жана автоунаа сатылган эмес,- деди Мөндөева.
Аталган сайттарга телеканалдын юристи кат жөнөткөн, бирок жооп келе элек.
Кырк чамалуу кызматкери бар ЖМТРК күн сайын 17 саат эфирге чыгат, көрсөтүүлөрү Жалал-Абад, Ош аймактарын камтыйт. (RsK)
