Ош облусунун Өзгөн районунда 14 жаштагы кызын зордуктаган деген шек менен кармалган 47 жаштагы жергиликтүү тургун тергөө бүткүчө, эки айга камакка алынды. Бул тууралуу “Азаттыкка” Ош облустук ички иштер башкармалыгынын басма сөз катчысы Жеңишбек Аширбаев билдирди.
Анын айтымында, шектүүнүн бөгөт чарасы боюнча чечимди Өзгөн райондук соту кабыл алды.
Кеп болуп жаткан киши 20-январда кармалган. Ал сурак учурунда өзүнүн кызын зордуктап жүргөнүн мойнуна алган. Баштапкы кабарларга ылайык, шектүү психикалык оору менен жабыркайт.
Окуучу кыздын апасы 2013-жылы оорудан улам көз жумган. Кыз атасынан алты айлык боюнда бар, учурда туугандарынын колунда кармалууда. Райондук администрациянын адистери анын мындан аркы тагдырын чечүүнүн жолун издеп жатышат.
Кылмыш иши боюнча тергөө иштери уланууда. Кыздын кейиштүү тагдыры тууралуу алгач Оштогу "Ак жүрөк" кризистик борбору маалымдаган. (ErN)