4-февралда Ташкентте Өзбекстан менен Евробиримдиктин ортосундагы кызматташтыкты кеңейтүү жөнүндө сүйлөшүүлөрдүн биринчи айлампасы башталды. Документ соода-сатыкка, инвестицияга жана аймактык коопсуздукка артыкчылык берет.
Документке Өзбекстандын президенти Шавкат Мирзиёевдин үстүбүздөгү жылы белгиленген Брюсселдеги сапары маалында кол коюлат деп күтүлүп жатат. Бул тууралуу “Азаттык” радиосунун өзбек редакциясы билдирди.
Былтыр 23-ноябрда Ташкент менен Брюссель келишимди сүйлөшө баштаганы маалым болгон.
Өзбекстан менен Евробиримдиктин ортосундагы азыркы иштеп жаткан макулдашуу 1999-жылдын 1-июлунан тарта иштей баштаган.
Ушул тапта Еробиримдик Өзбекстанда жалпысынан 103 миллион евролук 25 долбоорду ишке ашырып жатат. Алар - экономика жана социалдык өнүгүү багытындагы долбоорлор. Жалпы суммасы 33,5 миллион евролук 10 аймактык долбоор да иштеп жатат.