Сынак КТРКнын азыркы жетекчиси Илим Карыпбековдун иштөө мөөнөтү аягына чыгып жатканына байланыштуу жарыяланды.
КТРКнын Байкоочу кеңешинин мүчөсү Азамат Болгомбаевдин "Азаттыкка" билдиргени боюнча, сынакка катышуучу талапкерлер Байкоочу кеңештин төрагасынын атына арызын, түстүү сүрөтү менен кошо өздүк таржымалын, өмүр баяны, паспортунун жана жогорку билими жөнүндө дипломунун көчүрмөсүн дагы бир топ документтерин тапшырат:
- Сынак расмий түрдө жарыяланды. Ага катышууну каалагандар тийиштүү документтерин Байкоочу кеңештин катчылыгына жибериши керек. Андан кийин төрт баскыч менен тандоо иштери жүрөт.
Болгомбаевдин айтуусунда сынактын катышуучулары КТРКны өнүктүрүү боюнча ой-пикирлерин жазуу түрүндө жана оозеки айтып берүүгө тийиш.
КТРК жөнүндө мыйзамга ылайык, башкы директор төрт жылга шайланат. Сынактын талаптары боюнча, талапкерлердин жогорку билими болушу керек.
Муну менен катар мамлекеттик тилди эркин сүйлөгөн, орус, англис жана башка тилдерди билгендерге артыкчылык берилет. Беш жылдан кем эмес жетекчилик иш тажрыйбасы, телерадионун иштөө принциптерин жана коомдук телерадиоберүүнүн өзгөчөлүктөрүн билүү жана түшүнүп-баамдоосу зарыл. Талапкер коомдук-саясий жана диний уюмдарда кызмат ордун ээлей албайт. Ошондой эле мөөнөтүнөн кечиккен документтер кабыл алынбайт. (ZKo)
