Ички иштер министрлигинин маалыматына караганда, экстремизм менен радикализмдин алдын алуу максатында аймактарда ислам дини боюнча түшүндүрүү иштери жүргүзүлүүдө.
Негизинен исламдын негиздери жана салттуу дин тууралуу окуулар, жолугушуулар декабрдын аягында өткөрүлө баштады.
Дин иштери боюнча мамлекеттик комиссия менен бирге имамдарга жана дин кызматкерлерине радикалдашууга жол бербеш үчүн кошумча курстар өткөрүлдү.
Милиция Кыргызстанда тыюу салынган диний уюмдарга катышы бар экени сөз болгон жарандардын үйлөрүндө тинтүү иштерин да жүргүзгөн.
25-декабрда Ысык-Көл облусунун Жети-Өгүз, Түп райондорунда жана Каракол шаарында 13 үй текшерилип, мыйзамсыз сакталган ок атуучу куралдар, китептер, кол жазма дептерлер, баракчалар, дисктер жана чөнтөк телефондор алынганы кабарланды. Азыр алар экспертизада.
Кыргызстанда "Хизб-ут Тахрир", "Талибан", "Ислам мамлекети", "Түркстанды бошотуу кыймылы", "Өзбекстан ислам кыймылы", "Ал-Каида" сыяктуу 20дай уюмдун, айрым диний агымдардын ишмердүүлүгүнө тыюу салынган. УКМК кийинки жылдары бул топторго мүчө болгон адамдар кармалганын байма-бай кабарлап келет.
Атайын кызматтын маалыматына караганда, Сириянын согуш болуп жаткан аймактарына Кыргызстандан 850 жаран кетип, анын 150сү ошол жакта курман болгон.
Буга чейинки маалыматтарда Сирия менен Иракта согуштук аракеттерге катышып жүргөн кыргызстандыктар 600дөн ашканы, согуш талаасында 92 кыргызстандык мерт болгону айтылган.
Күч органдары Сириядагы согушка катышкан жыйырмадай киши кайтып келгенин жарыялаган. (NT)