Контртеррористтик иш-чаралардын алкагында эл аралык террордук уюмдардын биринин үгүтчүсү, 36 жаштагы А.Э. аттуу Кыргызстандын жараны кармалды. Бул тууралуу Улуттук коопсуздук боюнча мамлекеттик комитетинен билдиришти.
Колго түшкөн адам террордук уюмдун жетекчилеринин көрсөтмөсү менен 2015-жылы Сирияга Кыргызстандын төрт жаранын жөнөткөн. Сириядагы куралдуу чыр-чатактар аймагына рекруттарды жиберүү жана пропагандалоо иштерин жүргүзүү үчүн акыркы жылдары жакынкы чет өлкөлөрдүн бирине барып, ошол жерде туруктуу жашап жүргөн.
Ушул жылдын 17-апрелинде террордук уюмдун бандиттик түзүмдөрүнүн катарын жаңы жоочулар менен толуктоо үчүн Кыргызстандын жарандарын алып кетүү максатында келген.
Бул факты боюнча Кылмыш-жаза кодексинин 375-беренеси (“жалданмачылык”) боюнча кылмыш иши козголду. Кармалган жаран УКМКнын убактылуу кармоочу жайына киргизилди. Тергөө уланууда. (ErN)
