"Республика - Ата Журт" фракциясынын мүчөсү Марлен Маматалиев Бишкекте жолдорду оңдоого өтө эле узак мөөнөт берилип жатканына нааразылыгын билдирди. Депутат 300 метрден ашпаган жолдор деле эки-үч айга созулуп, оңдоого жабылып жатканына нааразылыгын билдирип, бул шаардын башка көчөлөрүндө жол тыгынын жаратып жатканына көңүл бурду. Марлен Маматалиев ошондой эле жаңы курулуп, пайдаланууга берилип жаткан жолдордун сапатына да көңүл буруп, чала бүтүргөн жетекчилердин жоопкерчилигин кароону өкмөттүн парламенттеги өкүлүнө тапшырды.
Бишкекте акыркы жылдары оңдолуп, пайдаланууга берилген жолдордун кайра эле жарактан чыгып жатканы тууралуу маалымат каражаттарында, социалдык тармактарда көп жазылууда.
Бишкек мэриясынын маалыматы боюнча, учурда борбор калаадагы 13 көчө оңдоп-түзөө иштерин жүргүзүү үчүн убактылуу жабылган. (ZKo)
