ChatGPT өз мәтіндерін көрінбейтін белгілермен белгілей бастайды
ChatGPT алдағы екі аптада генерацияланған мәтіндерді көрінбейтін су белгілерімен таңбалай бастайды. Бұл туралы OpenAI хабарламасында айтылған, деп хабарлайды Tengri Life.
Компания контенттің шығу тегін тексеру адамдарға оның қайдан алынғанын, қалай жасалғанын немесе редакцияланғанын және оның біздің модельдерімізбен байланысты белгілерді қамтитын-қамтымайтынын түсінуге көмектесетінін атап өтті.
"Алдағы апталарда Еуропалық Одақта ChatGPT және Codex арқылы шығарылатын мәтіндік хабарламаларға көрінбейтін су белгісін қосамыз. Мәтіндік су белгілерін анықтайтын детекторымызға қол жеткізуге өтінімдер қабылдауды бастаймыз. Бастапқыда қолжетімділік осы технологияны бағалауға және жетілдіруге көмектесетін бекітілген зерттеушілер мен сараптамалық ұйымдарға ғана беріледі", - делінген компания мәлімдемесінде.
OpenAI тек мәтіндер емес, аудио және кескіндер де шығу тегі бойынша тексерістен өтетінін атап өтті.
OpenAI өкілдерінің айтуынша, Еуропалық Одақтың жасанды интеллект (ЖИ) саласындағы заңнамасы мәтінді машиналық оқу арқылы сәйкестендіруді қарастырады. Әзірлеушілер қабылданған шаралар ЕО талаптарына сай келетінін, сондай-ақ ашықтықты қамтамасыз ететінін баса айтты.
TextGrain су белгілері технологиясы модель таңдайтын сөздерге көрінбейтін стилистикалық белгілерді қосады. Детектор осы белгілерді іздейді және олардың OpenAI тарапынан жасалғанын анықтайды. Сонымен қатар, компания детектерлер мәтінде бар су белгісін байқамай қалуы немесе жоқ су белгісі туралы қате ақпарат беруі мүмкін екенін ескертеді.
"Бұл шектеулер детекторымызға бастапқы қолжетімділікті тек сенімділік пен жауапты қолданысты бағалауға көмектесе алатын бекітілген зерттеушілер мен сараптамалық ұйымдарға беру туралы шешімімізге әсер етті", - деп хабарлады OpenAI.
Компания "дәлелдемелер, стандарттар мен нормативтік талаптар дамыған сайын өз тәсілімізді бейімдеп, нәтижелерді жауапты түрде түсіндіруге болатынына сенімді болған кезде детекторға қолжетімділікті кеңейтетініне" сендірді.