Венгрияда біреу премьер-министрдің бетіне шарап шашып жіберген
Саясаткер болған жайттың видеосын Facebook-тегі парақшасында жариялады. Мадьяр Печ қаласындағы сапарынан кейін Сексардқа соғып, жергілікті Szekszárdi Szüreti Napok мерекесіне барған. Премьер-министр жиналғандармен сөйлесіп, бірге суретке түскен.
Сол сәтте көпшіліктің арасында тұрған ер адамдардың бірі қолындағы бокалдағы шарапты Мадьярға қарай шашып жіберген. Оқиға видеоға түсіп қалған.
Күзетші оны дереу алып кетті, ал премьер-министр мекеме қызметкерлерімен әңгімесін жалғастыра берді.
Мадьяр ер адамның жақын келуге батылы жетпегенін және керемет шараптың босқа рәсуа болғанын жазды.
"Орбанның бұрынғы жақтастарының бірі мас болып, өтірік батырсынған. Печтен қайтар жолда жергілікті тұрғындардың шақыруымен Сексардтағы Өнім жинау мерекесіне бардық. Жұрттың көңілді отырғаны, ал біздің жүздеген адаммен сөйлесіп, бірге суретке түсіп жүргеніміз бұл "мырзаның" шамына қатты тиген сияқты. Бірақ маған жақындап келіп, бетіме тіке қарауға батылы жетпеді", – деп түсіндірді Венгрия премьері болған жағдайды.
Бұл саясаткерге жасалған алғашқы шабуыл емес. Бұған дейін Будапешттегі Батыс вокзалының жанында брифингке бара жатқанда оған біреулер түкіріп кеткен болатын. Ол кезде Мадьяр бұл жағдайға сабырмен қарап, Венгрияны қауіпті ел деп санамайтынын айтқан еді.