Қырғызстан парламентінің спикері МҰҚК экс-басшысы тарапынан қоқан-лоққы жасалғанын мәлімдеді

Қамшыбек Тәшиев Мемлекеттік ұлттық қауіпсіздік комитетін басқарып тұрған кезде, оның айналасындағылар Қырғызстан Жоғарғы Кенешінің (Парламентінің) депутаттарына қысым көрсеткен. Бұл туралы парламент спикері Марлен Маматалиев журналист Әли Тоқтақұновқа берген сұхбатында айтты, деп хабарлайды Tengrinews.kz 24.kg-ге сілтеме жасап.
Парламент спикерінің айтуынша, Қамшыбек Тәшиевтің жанында жүрген депутаттар өзге әріптестерінің әрбір сөзі мен іс-әрекетін "деструктивті" деп қабылдап, оны бұрмалап түсіндіруге және саяси мақсатта пайдалануға тырысқан.

"Кейбір депутаттар Қамшыбек Тәшиевке жақындай түсу үшін бе, әлде оның сенімді адамы екенін көрсеткісі келді ме, әйтеуір осы жағдайды жиі пайдаланатын кездер болды", - деді Марлен Маматалиев.

Сондай-ақ ол парламенттік сайлау кезінде өзіне де қысым жасалғанын айтты. Маматалиевтің сөзіне қарағанда, үгіт-насихат жұмыстары басталған алғашқы күні-ақ оған өз кандидатурасын алып тастау туралы ұсыныс түскен. Оның орнына министрдің орынбасары лауазымын, кейін министр етіп тағайындауды және шығындарын өтеп беруді уәде еткен. Сонымен қатар оған "генералдан сәлем" айтып, "өміріңді ойла" деп ескерткен.
Марлен Маматалиев депутат болғаннан кейінгі жағдайға да тоқталды. Оның айтуынша, экс-депутат Нұрланбек Тұрғынбекұлы оған генералдың нұсқауымен жеке фракция құрмауы керектігін, әйтпесе депутаттық мандатынан айырылуы мүмкін екенін жеткізген. Маматалиев бұл талаппен келіспеген. Содан кейін оның парламенттің жетінші қабатындағы жұмыс кабинетін тартып алған.
Бұған дейін Қырғызстан президенті Садыр Жапаров та Әли Тоқтақұновқа сұхбат берген болатын. Ол 2027 жылғы президент сайлауына қатысудан бас тартып, бұл лауазымға МҰҚК-ның бұрынғы төрағасы Қамшыбек Тәшиевтің кандидатурасын қолдау нұсқасын қарастырғанын айтқан еді.