Қазгидромет Алматы мен тағы екі қаланың тұрғындарына ескерту жасады

"Қазгидромет" өзінің ресми сайтында Алматы мен тағы екі қаланың тұрғындарына ескерту жариялады, деп хабарлайды Tengrinews.kz.
Ақпарат бейсенбіге арналған ауа сапасы болжамына қатысты.

"27 тамызда Алматы мен Ақтөбеде, түнде Атырауда қолайсыз метеорологиялық жағдай болжанады", - делінген хабарламада.

Ауаның ластануы түріндегі қолайсыз метеожағдай - бұл атмосфераның жерге жақын қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлардың (желсіздік, әлсіз жел, тұман және инверсия) жиынтығы.
Синоптиктердің мәліметінше, Алматыда күн райы құбылмалы болады, жауын-шашын күтілмейді. Солтүстік-шығыстан соғатын желдің жылдамдығы секундына 3-8 метрге жетеді. Ауа температурасы түнде +14...+16 градус , күндіз +30...+32 градусқа дейін көтеріледі.
Ақтөбеде күн райы құбылмалы, жауын-шашынсыз. Солтүстік-батыстан соғатын желдің жылдамдығы секундына 7-12 метр. Ауа температурасы түнде +12...+14 градус, күндіз +25...+27 градус болады.
Атырауда күн ашық, жауын-шашынсыз. Солтүстіктен соғатын желдің жылдамдығы түнде секундына 1-6, күндіз 6-11 метрге жетеді. Ауа температурасы түнде +16...+18 градус, күндіз +29...+31 градус болады.
Бұған дейін синоптиктер 27, 28 және 29 тамызға арналған ауа райы болжамын ұсынды. Болжамға сәйкес, Қазақстанда жақын күндері ауа райы күрт өзгереді. Елдің басым бөлігінде найзағай ойнап, жаңбыр жауады, кей жерлерде қатты жауын-шашын, бұршақ және дауыл болуы мүмкін.
Тағы оқыңыз: Астанада күн күрт суытып, Алматыда 34 градус ыстық болады