Назарбаев омыртқасына ота жасатқан
Тұңғыш президент Нұрсұлтан Назарбаев жаңа бір палаталы Құрылтай депутаттарын сайлауда дауыс берді, - деп хабарлайды Tengrinews.kz тілшісі.
Тұңғыш президенттің ресми сайтындағы мәлімет бойынша, Нұрсұлтан Назарбаев жақында омыртқасына жасалған отадан кейін денсаулығына байланысты өз дауысын үйден берді.
23 тамыз – сайлау күні
Бүгін елімізде Құрылтай депутаттарын сайлау өтіп жатыр. Дауыс беру күні 18 жасқа толған Қазақстан азаматтарының барлығы сайлауға қатысуға құқылы.
Сайлаушылар бюллетеньде өздері қолдайтын саяси партияны таңдайды. Заңда белгіленген межеден өткен партиялар Құрылтайдағы депутаттық мандаттарға ие болады.
Дауыс беру сағат 20:00-де аяқталады. Сайлау учаскелері жабылғаннан кейін дауыстарды санау басталады. Одан соң Орталық сайлау комиссиясы арнайы отырыста сайлау қорытындысын шығарады. Нәтижелер хаттамамен рәсімделіп, бұқаралық ақпарат құралдарында ресми түрде жарияланады.
Заңға сәйкес, сайлаудың түпкілікті қорытындысы дауыс беру аяқталғаннан кейін жеті күннен кешіктірілмей, яғни 2026 жылғы 30 тамызға дейін жариялануға тиіс.
Бұған дейін Орталық сайлау комиссиясы учаскелердің ашылғаны және дауыс берудің басталғаны туралы хабарлаған. Жалпы елде және шетелде 10 423 сайлау учаскесі жұмыс істеп тұр. Ең алғашқы болып шетелдегі Сеул мен Токио қалаларындағы учаскелер ашылды.
Сеулде сайлауға қатысқан алғашқы қазақстандықтардың бірі Корея университетінің студенті болды.
Tengrinews.kz дауыс беру барысын онлайн режимде бақылап отыр.