Қазақстандықтарға мол табыс уәде ететін жалған инвестициядан сақ болу ескертілді
Қазақстан полициясы әлеуметтік желілер, мессенджерлер мен интернет-платформалар арқылы ұсынылатын күмәнді инвестициялық жобалардан сақ болуға шақырды, - деп хабарлайды Tengrinews.kz тілшісі Polisia.kz-ке сілтеме жасап.
Полиция мәліметінше, алаяқтар өздерін брокер, инвестициялық компания қызметкері немесе қаржы маманы ретінде таныстырып, "жоғары табыс", "кепілді пайда" және "тәуекелсіз инвестиция" ұсынады.
Алдымен олар аз мөлшерде ақша салуды ұсынады. Кейін жалған сайт немесе қосымша арқылы шоттағы қаражат көбейіп жатқандай көрсетеді. Біраз уақыттан соң "инвестицияны ұлғайту", "комиссия төлеу" немесе "шотты бұғаттан шығару" деген сылтаумен тағы ақша аударуды талап етеді.
Адам ақшасын шешіп алмақ болғанда сайт жұмысын тоқтатады, аккаунт бұғатталады немесе "кеңесші" байланысқа шықпай қояды. Соның салдарынан адам салған ақшасынан айырылып қалады.
Алаяқтарға алданып қалмау үшін мына қарапайым ережелерді ұстанған жөн:
100 пайыз кепілдікпен жоғары табыс табасыз деген уәдеге сенбеңіз.
"Бірнеше күнде ақшаңызды бірнеше есе көбейтеміз" деген ұсыныстардан сақ болыңыз.
Шешімді тез қабылдауға асықтыратын адамдарға сенбеңіз.
Бейтаныс адамдардың нұсқауымен ақша аудармаңыз.
Банк картасының деректерін, CVV-кодты және SMS арқылы келген кодтарды ешкімге айтпаңыз.
Күмәнді сілтемелерге өтпеңіз және белгісіз қосымшаларды орнатпаңыз.