ПСЖ УЕФА Суперкубогын қатарынан екінші рет иеленді
Австрияның Зальцбург қаласында 2026/2027 жылғы еурокубок маусымының алғашқы матчі өтті. Жанкүйерлер УЕФА Суперкубогының жаңа иегерін анықтады, деп хабарлайды Tengri Sport.
Париждік ПСЖ "Астон Вилланы" 2:1 есебімен жеңіп, 2026/2027 жылғы маусымның УЕФА Суперкубогын иеленді. Луис Энрике шәкірттері жаңа маусымдағы алғашқы жүлдесіне қол жеткізсе, бұл клуб тарихындағы екінші Суперкубок болды - бір жыл бұрын париждіктер пенальти сериясында "Тоттенхэмнен" басым түскен еді.
Есепті Хвича Кварацхелия ашты: ПСЖ вингері Кешті қапы қалдырып, жақын бұрышқа қарай жойқын соққы бағыттады - "Астон Вилла" қақпашысы құтқара алмады. Бірінші таймның соңында Бирмингем клубы Макгинн мен Маджоның үйлесімді ойынының арқасында есепті теңестірді: 17 жастағы Брайан Маджо УЕФА Суперкубогы тарихындағы ең жас гол авторы атанды.
Үзілістен кейін төреші басында Дуэ соққан голды офсайдқа байланысты есептемегенімен, VAR жүйесін қараған соң гол тіркелді. ПСЖ қайтадан алға шығып, финалдық ысқырыққа дейін басымдықты сақтап қалды.
Матч төрелік ету жағынан да тарихта қалды: УЕФА Суперкубогына алғаш рет еуропалық емес маман - сомалилік төреші Омар Артан қазылық етті.