73 жасында арманын орындауға бел буды: қазақстандық әжейдің ерекше хоббиі Қазнеттің назарын аударды
"Велосипед тебуді үйретші!"
Әлгі қыз Айдана Жолмағамбет болып шықты. Сол күні ол теңіз жағасында серуендеуге шығып, велосипедті жалға алып, жүріп бара жатып телефонына видео түсірген. Бір сәтте оған Балым әже келіп, ерекше өтініш білдіреді. Айдана бұрын-соңды бұл зейнеткерді көрмегенін, бірақ бетін қайтара алмай, көмектесуге қуана келіскенін айтты.
Instagram-дағы бұл жарияланымды көру
Айдана Қожахметқызы / Дефектолог-диагност | UGC (@aidnaaa) жарияланымы
Кездейсоқ кездесу тез арада достыққа ұласты. Қазір Балым мен Айдана араласуын тоқтатпай, таңертең бірге серуендеп тұрады.
"Әже мені теңіз жағасынан табылған қызым дейді. Өзі өте белсенді, өзгелермен тез тіл табысады. Балым әже маған жиі қоңырау шалады, таңертең бірге серуендейміз. Мен үшін біздің достығымыз - нағыз құндылық", - дейді Айдана.
Желі қолданушыларының реакциясы
Алғашқы кездесу мен велосипед тебу сабағы түсірілген ролик әлеуметтік желіде танымал болды. 73 жастағы Балым мен 26 жастағы Айдананың хикаясы мыңдаған қолданушының жүрегін тебірентті.
Пікір қалдырушы қазақстандықтар бұл видео жаңа дүниені бастау ешқашан кеш емес екенін еске салғанын жазып жатыр.
Instagram-дағы бұл жарияланымды көру
Айдана Қожахметқызы / Дефектолог-диагност | UGC (@aidnaaa) жарияланымы
Видео жарияланғаннан кейін желі қолданушылары Айданадан Балым әже туралы көбірек видео түсіруді сұрай бастаған. Алайда қыз бұл достықты контент көзіне айналдырғысы келмейтінін айтты.
"Расында, көбісі "Әже не айтты, тағы видео түсірші" деп жазып жатады. Бірақ маған мұны контент үшін жасау ыңғайсыз. Мен үшін Балым әже - даналықтың кеніші. Оның бөлісетін хикаялары өте көп. Меніңше, қазіргі жастарға осындай өмірлік тәжірибесі бар мейірімді әжелер жетіспейді", - деді Айдана.
"Кездейсоқ таныстық сыйға айналды"
Айдананың өзі екі бала тәрбиелеп отыр. Мамандығы бойынша дефектолог-диагност және ерекше қажеттіліктері бар балаларға арналған түзету орталығының негізін қалаушы. Оның айтуынша, Балым әжемен кездейсоқ таныстығы ол үшін нағыз сый және шынайы адами қарым-қатынасты бағалаудың маңыздылығын еске салған сәт болды.
Балым әже үшін теңіз жағасындағы серуен алғаш рет велосипедке отыруға мүмкіндік берді. Ал Айдана үшін бұл кездейсоқ жолыққан адаммен үлкен достықтың бастауы болды.
Қазақстандықтардың бұл хикаясы желі қолданушыларына қарапайым ақиқатты еске салды: кейде бір кездейсоқ кездесу нағыз достық сыйлауы мүмкін, ал жаңа нәрсені үйренуді кез келген жаста бастауға болады.
Бұған дейін 83 жастағы қазақстандық әжей Данангқа (Вьетнам) жасаған саяхатымен әлеуметтік желіні баурап алған болатын. Оның немересі жариялаған қызықты суреттер мен видеолар желіде 400 мыңға жуық қаралым жинады. Желі қолданушылары әженің қуаты мен өмірге деген құштарлығына тәнті болды.
Тағы оқыңыз: 74 жастағы әже өмірге деген шынайы махаббат қандай болатынын көрсетті