Автосалоннан жаңа көлік алған алматылық “тосынсыйға“ тап болды
Ер адам жаңа көлікті маусым айының басында сатып алған. Оның сөзінше, үйге бара жатқан жолда салқындату жүйесінің кеңейту багы жарылып, салдарынан қозғалтқыш қыза бастаған. Көлік эвакуатормен сервистік орталыққа жеткізілді.
Диагностикадан кейін дилер ақаулы бөлшекті ауыстырып, мәселенің шешілгенін хабарлаған. Алайда екі күннен кейін Алматы – Семей тасжолында келе жатқанда, ер адамның айтуынша, қозғалтқыш қайтадан қыза бастаған. Көлік тағы да эвакуатормен сервистік орталыққа жеткізілді.
"Келгеннен кейін, диагностика жасап, қозғалтқыштың, атап айтқанда цилиндр бастиегінің ақауы бар деген қорытынды шығарды және маған қозғалтқышты ауыстыруды ұсынды. Бұл жағдайда мен ұсыныстан бас тарттым. Неге? Өйткені көлік жаңа. Тіпті үш күн де жүрген жоқ. Олар бұл зауыттық ақау екенін растады. Бұл келісімге қол қою арқылы мен сотқа жүгіну, мәселені БАҚ-та жариялау құқығынан айырылады екенмін. Олар мұны тармақтар бойынша көрсетіп қойған. Сондай-ақ ақшаны қайтару мерзімі де белгіленбеген", - дейді алматылық тұрғын.
Қазір көлік дилерлік орталықта тұр. Ресми дистрибьютор компанияның бұл жағдайдан хабардар екенін мәлімдеді. Олардың мәліметінше, диагностика кезінде кепілдік міндеттемелер аясында жөнделуі тиіс ақаулар анықталған.
"Клиентке мәселені лояльділік бағдарламасы бойынша көлікті толық құнына кері сатып алу арқылы реттеу ұсынылды. Сонымен қатар клиент бірқатар объективті, соның ішінде заңнамалық және техникалық сипаттағы себептерге байланысты компания орындай алмайтын қосымша шарттар қойды. Дилерлік орталық өндірушінің кепілдік саясатына және Қазақстан Республикасы заңнамасының талаптарына сәйкес әрекет етеді. Компания өз міндеттемелерін орындаудан бас тартпайды және жағдайдың тез арада сындарлы түрде шешілуіне үміттенеді", - деп хабарлады ресми дистрибьютор.
Заңгерлердің айтуынша, егер тараптар ымыраға келе алмаса, жағдайға тек сот қана түпкілікті құқықтық баға бере алады. Олар сатып алушы көлікті алу үшін ресімделген несие шартын жарамсыз деп тану туралы талап қоюға құқылы екенін атап өтті.
"Бұдан кейін автосалон орналасқан аудандық сотқа талап арыз түсіру қажет. Сондай-ақ талап қоюшы автосалоннан заңгер қызметіне кеткен шығындарды, моральдық зиян өтемақысын және төленген мемлекеттік баж салығын өндіріп алуды талап ете алады. Нәтижесінде автосалонның шығындары айтарлықтай жоғары болуы мүмкін. Сондықтан, заңгер ретінде мен бұл дауды бейбіт жолмен шешкен дұрыс деп санаймын", - деді заңгер Ғабит Өмірбек.
Кейінгі жарты жылда қазақстандықтар 105 мыңнан астам жаңа автокөлік сатып алған. Сауда және интеграция министрлігінің мәліметінше, жыл басынан бері қазақстандықтардан сатып алынған көліктердің ақауына қатысты 40-қа жуық шағым түскен.