Қазақстандық клуб Чемпиондар лигасында “Барселонамен“ ойнайды
Футзалдан Чемпиондар лигасының жеребесі барысында қазақстандық "Қайрат" пен "Семей" клубтарының негізгі кезеңдегі қарсыластары анықталды, деп хабарлайды Tengri Sport УЕФА баспасөз қызметіне сілтеме жасап.
Баспасөз қызметінің мәліметінше, елдің екінші командасы "Семей" каталониялық "Барселона", словакиялық "Лученец" және швейцариялық "Минервамен" бір топқа түсті.
Айта кетейік, каталониялықтар Чемпиондар лигасының төрт дүркін жеңімпазы. Бұл ретте олар 2015 жылы финалда қазақстандық тағы бір команда - "Қайраттан" жеңілген болатын.
Биыл чемпиондық атағын қайтарып алған алматылық ұжым да өз қарсыластарын білді.
"Қайрат" латвиялық "Бейтар", румыниялық "Юнайтед Галац" және бельгиялық "Спортинг - Андерлехтпен" ойнайды. Соңғысын "Қайрат" былтыр 1/8 финал сатысында жарыстан шығарған еді.
Фото: uefa.com/uefafutsalchampionsleague
Футзалдан Чемпиондар лигасы регламентіне сәйкес, әр топтағы негізгі кезеңнің барлық матчі бір қалада өтетінін атап өткен жөн. "Семей" мен "Қайрат" топтарының қожайындары "Лученец" пен "Спортинг-Андерлехт" болады.
Барлық ойын 27 қазан мен 1 қараша аралығында өтеді.
Еске сала кетейік, былтыр футзалдан Чемпиондар лигасында Қазақстан намысын "Семей" мен "Қайрат" қорғаған болатын. Екі команда да 1/4 финалға дейін жеткенімен, "Төрттік финалына" жете алмады.
Бүгін футболдан "Қайрат" 2026/2027 жылғы Чемпиондар лигасының іріктеу кезеңіндегі алғашқы матчін өткізеді. Алматылық команданың қарсыласы Черногорияның "Сутьеска" клубы болады.