1 қыркүйектен бастап Қазақстан мектептерінде жаңа міндетті пәндер мен курстар пайда болады

Жаңа оқу жылынан бастап Қазақстан мектептерінде жаңа міндетті оқу пәндері мен курстары пайда болады. Бұл туралы үкімет отырысында оқу-ағарту министрі Жұлдыз Сүлейменова мәлімдеді, деп хабарлайды Tengri Education.
Министрдің айтуынша, өзгерістер жаңа Конституцияны іске асыру аясында әзірленген және әртүрлі жастағы оқушыларға арналған бағдарламаларды қамтиды.

"Оқу жылының басынан бастап білім мазмұны бірқатар жаңа міндетті оқу курстарымен толықтырылады. 5-7-сынып оқушылары үшін "Конституция негіздері" пәні енгізіледі. 8-11-сыныптарда "Заң және тәртіп" міндетті курсы оқытылады. Сонымен қатар 5-11-сынып оқушылары үшін "Жеке қауіпсіздік" міндетті курсы енгізіледі", - деді Сүлейменова.

Сондай-ақ министр мектеп оқулықтарының мазмұны жаңартылатынын айтты.
30 тамызға дейін 3 және 7-сыныптарға арналған қайта басылып шыққан оқулықтар барлық білім беру ұйымдарына жеткізіледі. 4 және 9-сынып оқулықтарын 2027 жылғы 1 қаңтарға дейін, ал 8-сынып оқулықтарын 2027 жылғы 1 сәуірге дейін жеткізу жоспарланған.
Сүлейменованың сөзінше, бастауыш білім беру мазмұны да қайта қаралып жатыр. Бірінші сынып оқушылары үшін бейімделу кезеңі енгізіліп, оқу жүктемесі азайтылады, оқытудың практикалық бағыты күшейтіліп, бағдарламалар балалардың жас ерекшеліктеріне сәйкес келтіріледі.
Бұдан бөлек, Қазақстанда орта білім беру жүйесіне жасанды интеллект технологиялары енгізіле бастайды. Бірінші кезеңде жоба 500 шағын жинақты мектепті қамтиды, онда оқушылар заманауи цифрлық білім беру ресурстарына, ал мұғалімдер сабаққа дайындалу және білімді бағалауға арналған зияткерлік құралдарға қол жеткізеді.
Бұған дейін Оқу-ағарту министрі Жұлдыз Сүлейменова қазақстандық мектептерде "Жеке қауіпсіздік" атты жаңа міндетті пән пайда болатынын хабарлаған еді. Оның құрамына жол қозғалысы ережелері, жеке қауіпсіздік және қоғамдық орындарда өзін-өзі ұстау тақырыптары кіреді. Пәнді 5–9-сынып оқушылары оқитын болады.