АҚШ Иранға мұнай сатуға рұқсат берді

АҚШ Қаржы министрлігі Иран мұнайы экспортына уақытша лицензия берді - Вашингтон екіжақты реттеу аясында Иранға салынған санкциялардың бір бөлігін алып тастады, деп хабарлайды Tengrinews.kz тілшісі Reuters-ке сілтеме жасап.

Не болды?

Шетелдік активтерді бақылау басқармасының (OFAC, Америка Қаржы министрлігінің бөлімшесі) лицензиясы 21 тамызға дейін жарамды болады. Осы мерзімге дейін Иранда өндірілетін мұнай мен мұнай өнімдерін өндіруге, өңдеуге, сатуға, тасымалдауға және жөнелтуге, сондай-ақ соған байланысты мәмілелерге, соның ішінде сақтандыруға рұқсат етіледі. Бұл мақсатта АҚШ-тың санкциялық тізіміндегі кемелерді пайдалануға болады.

Сондай-ақ құжат Иран мұнайын тікелей АҚШ-қа жеткізуге рұқсат береді. Мұнай саудасы бойынша мәмілелер доллармен төленуі мүмкін, ал қаражат Иран үкіметінің немесе басқа да санкцияға ілінген тұлғалардың шоттарына түседі.

Уақытша жеңілдік Вашингтон мен Тегеран арасындағы екіжақты өзара түсіністік туралы меморандумда көрсетілген аралық келісімнің бір бөлігі болмақ. Құжатқа маусымның ортасында қол қойылды және ол соғыс қимылдарын тоқтатуды бекітіп, келіссөздерге негіз қалауға бағытталған.

Бұл нарыққа қалай әсер етеді?

Бұған дейін сарапшылар Иран мұнайына салынған санкциялардың уақытша алынуы әлемдік нарықтағы шикізат ұсынысын арттырып, Ормуз бұғазының ашылуымен бірге әлемдік бағаның төмендеуіне әкелетінін бірнеше рет болжаған болатын. 28 ақпанда соғыс қимылдары басталғаннан кейін мұнай күрт қымбаттады, ал Тегеранның әлемдік мұнайдың шамамен 20 пайызы тасымалданатын бұғазды жауып тастауы ауқымды отын дағдарысына әкеліп, әсіресе бұғазға көбірек тәуелді араб өндіруші елдеріне қатты соққы болды.

Бұл хабарламадан кейін мұнай бағасы шамалы төмендеді. Жарияланым шыққан сәтте Лондонның ICE биржасында Brent маркалы мұнайдың тамыздағы фьючерсі барреліне 77,73 доллардан саудаланды, бұл кешегі сауда-саттықтың жабылу деңгейінен 3,5 пайыз төмен.