“Алаңдап қалдым“: Желіде Алматы хайуанаттар бағындағы ақ аюдың күтімі талқыға түсті
Не болды?
Тұрғын жазбасын танымал әлеуметтік желілердің бірінде жариялады. Оның айтуынша, видео 11 маусымда түсірілген. Сол күні сыртта отыз градус ыстық болған.
"Ақ аюлар - суыққа, қар мен мұзға бейімделген арктикалық жануарлар. Сондықтан оның күйіне алаңдап қалдым. Қоршаудағы салқындату жүйесі дұрыс па, жоқ па, білмеймін, бірақ сырттай қарағанда жануарға өте ауыр тиіп жатқандай көрінеді. Хайуанаттар бағынан ресми түсініктеме алып, мұндай аптапта ақ аюға қандай жағдай жасалғанын білгім келеді", - деді ол.
Кей пікір қалдырушылар жағдайды жақсартуды талап еткен.
Хайуанаттар бағы өкілдері не дейді?
Мекеме мәліметінше, Алматы хайуанаттар бағында жаз айларында ақ аюға барлық қажетті жағдай жасалған.
"Ол жерде салқын суы бар екі бассейн, өндірістік кондиционерлері бар салқындатылатын апан, сондай-ақ мұз және қар генераторы бар. Ақ аюдың жай-күйі ветеринар мамандар мен хайуанаттар бағы қызметкерлерінің тұрақты бақылауында. Бүгінде оның денсаулығына ешқандай қауіп жоқ", - деді баспасөз қызметі.
Сондай-ақ Алматы хайуанаттар бағындағы ақ аюдың қоршауы жануарларды ұстаудың заманауи халықаралық стандарттарына сәйкес келетіні нақтыланды.
"Бассейндердің айналасындағы аумаққа табиғи топырақ жайылған, бұл жануардың үйреншікті өмір салтын ұстануына мүмкіндік береді. Әлемнің көптеген хайуанаттар бағында мұндай аймақтар негізінен бетоннан жасалған. Сонымен қатар, бұл аумақ өте кең, ақ аюдың еркін қозғалуына, жүзуіне, демалуына және табиғи белсенділігіне толық мүмкіндік береді", - деп толықтырды хайуанаттар бағы өкілдері.