Қазақстандық ер адам айыптұрағында бөлшектелген жүк көлігі үшін ақша өндіріп алды

Сот күзет агенттігін арнайы тұрақта бөлшектелген автомобиль үшін шығынды өтеуге міндеттеді, деп хабарлайды Tengri Auto.

Жамбыл облыстық соты баспасөз қызметінің мәліметінше, 2015 жылы қазақстандықтың Volvo FH12 жүк көлігі несие қарызына байланысты тәркіленген. 2017 жылы жүк көлігіне тыйым салынып, жауапкер – күзет агенттігінің күзетіне берілген.

7 жылдан кейін тексеру кезінде автокөліктің негізгі тораптары мен агрегаттары ұрланғаны, ал машинаның өзі толықтай дерлік бөлшектелгені анықталды.

Талап қоюшы осының салдарынан автокөліктің құны 10 есеге жуық арзандап, бағасы 9,6 миллионнан 992 мың теңгеге дейін түсіп кеткенін көрсетті.

Жауапкер 2019 жылы нысанның басқа компанияға берілгенін айтып, талап арызды мойындамады, бірақ бұл туралы дәлелдемелер ұсынған жоқ.

Сот күзет компаниясының автокөліктің сақталуына жауапты болғанын және оны иесіне сол күйінде қайтаруы тиіс екенін анықтады. Компания бөлшектердің жоғалуына қатысы жоқтығын дәлелдей алмағандықтан, сот талап арызды қанағаттандырды.

Күзет агенттігінен 8,6 миллион теңгеден астам шығын, сондай-ақ автокөлікті бағалау шығындары мен мемлекеттік баж салығы өндірілді.

Компания шешімге шағым түсірді, бірақ апелляциялық сот бірінші сатыдағы соттың қорытындыларын қолдады.

Шешім заңды күшіне енді.