Чехия тұрғыны лотереядан 120 миллион еуро ұтып алды
Чехиялық Eurojackpot лотереясының қатысушысы бас жүлдеге қажетті барлық санды дәл тауып, 120 миллион еуро ұтып алды, деп хабарлайды Tengrinews.kz тілшісі Deutsche Welle-ға сілтеме жасап.
Чехияда Eurojackpot лотереясынан 120 миллион еуро, яғни шамамен 66,7 миллиард теңге көлеміндегі джекпот ұтылды. Ұтыс бір адамға немесе билетті бірге сатып алған адамдар тобына тиесілі болуы мүмкін. Бұл туралы лотереяны үйлестіруші Westlotto компаниясы мәлімдеді.
Ұту ықтималдығы – 140 миллионнан 1
Германияда да бірнеше жеңімпаз анықталды. Мәліметтерге сүйенсек, 4 миллион еуродан, яғни шамамен 2,2 миллиард теңгеден Солтүстік Рейн-Вестфалия федералдық штатының бір қатысушысына, Саксонияның екі тұрғынына және Тюрингияның бір азаматына бұйырған. Дәл осындай соманы Норвегия тұрғыны да иеленді. Алайда бұл ұтыстардың бір адамға немесе билетті бірге сатып алған адамдар тобына тиесілі екені нақтыланбаған.
Eurojackpot лотереясында ең жоғары ұтысты алу үшін қатысушылар 1-ден 50-ге дейінгі аралықтан бес санды және 1-ден 12-ге дейінгі аралықтан екі қосымша санды дұрыс табуы керек. Бұл жолы 5, 11, 23, 33, 42 сандары және 10 мен 12 қосымша сандары сәттілік әкелген.
Бұған дейінгі 13 ұтыс ойынында қатысушылардың ешқайсысы қажетті комбинацияны таба алмаған. Соның нәтижесінде бас жеңімпаз анықталмаған сайын өсіп отыратын жүлде қоры 120 миллион еуроға жеткен.
Биыл Eurojackpot лотереясында джекпот сегіз рет ұтылды. Сәуір айының басында Финляндия мен Словакия қатысушылары барлық ұтыс санын дәл тауып, 5 миллион еуродан, яғни шамамен 2,7 миллиард теңгеден алған.
Германиялық жеңімпаз соңғы рет 31 наурызда анықталған. Сол кезде Солтүстік Рейн-Вестфалия штатының тұрғыны немесе ойыншылар тобы барлық санды дұрыс тауып, 70,7 миллион еуро, яғни шамамен 39,6 миллиард теңге ұтқан.
Германияда лотерея ұтысына салық салынбайды. Eurojackpot ойынында дұрыс сандарды табу ықтималдығы 140 миллионнан 1-ге тең.