“Пицца индексі“. Пентагонда тағы да ерекше белсенділік байқалды
Не болды?
Ашық деректер арқылы қоғамдық тамақтану орындарының жүктемесін бақылайтын Pentagon Pizza Report аккаунты 25 мамыр күні АҚШ-тың шығыс уақытымен 17:45-те (Астана уақытымен 26 мамыр, 03:45) тапсырыстардың күрт артқанын тіркеді.
"Пентагонға ең жақын орналасқан Papa Johns пиццериясында келушілер ағыны әдеттегіден әлдеқайда көп екені байқалады. Пентагонның дәл іргесіндегі Nighthawk Brewery & Pizza сыра зауыты мен пиццериясы да келушілер саны орташа деңгейден жоғары екенін хабарлады", - делінген жарияланымда.
Пентагонға ең жақын Papa Johns мекемесінде жұмыс жүктемесі әдеттегіден жоғары. Пентагонның дәл жанындағы Nighthawk Brewery & Pizza келушілер ағыны орташа деңгейден жоғары екенін хабарлап жатыр.Шығыс уақытымен 17:45-тегі жағдай бойынша pic.twitter.com/YP2fC4TUHF
— Pentagon Pizza Report (@PenPizzaReport) 25 мамыр, 2026 жыл
Бұл неліктен талқыланып жатыр?
Желіде көп жылдан бері бейресми теория қалыптасқан: егер Пентагон маңында тамаққа тапсырыс берушілер саны күрт артса, демек, ведомство ішінде қарбалас жұмыс жүріп жатыр - бұл әскери операциялармен байланысты болуы мүмкін.
Бұл идеяны жақтаушылар мұның себебін қарапайым түсіндіреді: қызметкерлер жұмыста кеш батқанша қалып қояды, сондықтан олардың кеңседен тыс жерде түскі немесе кешкі ас ішуге уақыты болмайды.
Дегенмен, мұндай байланыстың ешқандай ресми растауы жоқ. Pentagon Pizza Report жобасының өзі тек ашық деректермен жұмыс істейтінін және ішкі ақпаратқа қолжетімділігі жоқ екенін баса айтады.
Сол уақытта не болды?
Бұқаралық ақпарат құралдарының хабарлауынша, дәл сол түні АҚШ Иранға әскери соққылар жасаған — соққылар стратегиялық маңызы бар Ормуз бұғазының маңындағы Бендер-Аббас ауданына бағытталды.
АҚШ Орталық қолбасшылығының өкілі Тим Хокинс шабуыл фактісін растады. Сонымен қатар, 8 сәуірде күшіне енген оқ атуды уақытша тоқтату туралы келісім ресми түрде өз күшінде қалып отыр.
Әлеуметтік желі қолданушылары тамаққа тапсырыстың артуы сыни сәттердегі әскери құрылымдардың күшейтілген жұмысын жанама түрде көрсетуі мүмкін деген болжам жасады. Бірақ сарапшылар мен сервистің өзі бұл тек ашық деректерге негізделген бақылау екенін, үкімет шешімдерінің нақты индикаторы емес екенін ескертеді.
Соңғы ірі белсенділік қашан байқалды?
Бұған дейін тапсырыстардың көбеюі Венесуэла президенті Николас Мадуро мен оның жұбайының ұсталуымен тұспа-тұс келген болатын. БАҚ мәліметінше, 3 қаңтарда Pizzato Pizza-дағы белсенділік түн ортасында - жергілікті уақытпен түнгі екіден төртке дейін шарықтау шегіне жеткен.