Минутына дейін жазылған: полиция Алматыдағы жасөспірімдер өлімінің егжей-тегжейін айтты
Мән-жайы
Қайғылы оқиға 30 сәуірге қараған түні болған. Компьютер клубындағы жанжал көшеде жаппай төбелеске ұласқан. Салдарынан 17 жастағы екі жасөспірім пышақ жарақатын алды. Олар ауруханаға ауыр халде жеткізілгенімен, дәрігерлер оларды аман алып қала алмады.
Қайғылы оқиғадан кейін қаза тапқандар бірінің туыстары жарақат алғанына қарамастан, жігітті алдымен ауруханаға емес, полиция бөлімшесіне апарғанын, "онда оның ұзақ уақыт бойы медициналық көмексіз қалғанын" айтты. Бұған дейін полиция бұл мәлімдемелерді жоққа шығарған болатын.
Қанша адам ұсталды?
Алматы полиция департаментінің ресми өкілі Салтанат Әзірбек төбелеске шамамен 12 адам қатысқан болуы мүмкін екенін хабарлады. Оның мәліметінше, олардың үшеуіне кісі өлтірді деген айып тағылып отыр.
"Адам өліміне әкеп соққан іс-әрекеттерді жасағандар анықталды. Бұл "Кісі өлтіру" бабы. Олар қамауға алынды, барлығы үш адам. Арасында кәмелетке толмағандар да бар. Қалған қатысушыларға Қылмыстық кодекстің 293-бабы "Бұзақылық" бойынша айып тағылды. Тергеу жалғасып жатыр», – деді Салтанат Әзірбек.
Сондай-ақ ол бейнебақылау камераларының арқасында оқиғаның хронологиясы минутына дейін анықталғанын атап өтті.
"Бізде бейнебақылау жүйесі бар, хронологияны нақты білеміз. 103 пультіне шақырту қашан түскені, жедел жәрдем бригадасының қай уақытта және қай мекенжайға келгені, тіпті реанимациялық шараларға дейін белгілі. Баланы бірден №7 қалалық клиникалық ауруханаға қалай жеткізгені де бар. Жедел жәрдем оқиға орнынан алып кеткен сәттен бастап ауруханаға дейін 5-6 минут өткен", – деп түсіндірді ол.
Бұған дейін Алматы облысында қызды шығарып салған 17 жастағы баланы жабылып өлтіріп кеткен.
Тағы оқыңыз: “Ауруханаға емес бөлімшеге апарған“. Алматы полициясы жасөспірімнің қазасы туралы жазбаларға жауап берді