Пара беруге уәде етсе сотталады. Қазақстанда жемқорлық үшін жаза қатаңдатылады
Қазақстанда пара алу-беруге қатысты, тіпті іс жүзінде пара берілмесе де, тек уәде етілгені үшін жазалау басталады. Толығырақ Мәжіліс депутаты Айдос Сарым айтып берді, деп хабарлайды Tengrinews.kz тілшісі.
Не болды?
Бүгін, 6 мамырда Мәжілісте сыбайлас жемқорлыққа қарсы күрес туралы заң талқыланды. Депутат Айдос Сарым заңның күшейтілетінін, енді тек пара үшін емес, оған дейінгі әрекеттер үшін де жазаланады.
"Жобада пара беруге уәде ету, ұсыну, талап етумен байланысты әрекеттер қылмыстық сипатқа ие болады", – деді Сарым.
Толығырақ
Айдос Сарымның айтуынша, енді жазалауға ғана емес, сыбайлас жемқорлықтың мүлдем туындамауына баса назар аударылады. Ол үшін мүдделер қақтығысын реттеу тәртібі егжей-тегжейлі жазылып, комплаенс қызметтер мен әдеп қызметтерінің рөлі күшейтіледі.
Анықтама: Комплаенс қызметтер – бұл заңнама талаптарының, реттеушілердің, ішкі ережелердің, сондай-ақ әдеп нормаларының сақталуын қамтамасыз ететін ұйымдардағы тәуелсіз құрылымдық бөлімшелер.
Сондай-ақ қатаң шектеулер енгізіледі – шенеуніктерге өз өкілеттіктерін жеке мүдделері үшін пайдалануға тікелей тыйым салынады. "Жеке пайда" ұғымы кеңейтіледі – мемлекеттік қызметшілер өздерінің ықтимал мүдделерін декларациялауы (яғни ресми түрде жариялауы) тиіс болады.
"Лауазымдық өкілеттіктерді жеке мүдделеріне пайдалануға жол бермеу түріндегі сыбайлас жемқорлыққа қарсы шектеулер енгізіледі. "Жеке мүдде" ұғымын ашу – жеке мүдделерді декларациялау міндеті. Бірлескен қызметке жол берілмейтін адамдар тобы кеңейтілді, олардың қатарына байланысты тұлғалар да енгізілді", – деп түсіндірді мәжілісмен.
Егер мүдделер қақтығысы уақтылы реттелмесе, бұл үшін жаза қолданылады. Ал мүдделер қақтығысы жағдайында қабылданған шешімдер заңсыз деп танылуы мүмкін.
Бұған дейін қазақстандық шенеуніктерге мінсіз беделге ие болу міндеттелетіні хабарланған болатын. Бұдан бөлек, олар есірткі заттарын тұтынғаны немесе көлік құралын мас күйінде басқарғаны үшін жұмыстан шығарылады. Мұндай норма бүгін Мәжілісте мақұлданған мемлекеттік қызмет туралы заң жобасында жазылған.