Трамп қатысқан кешкі аста оқ жаудырған ер адам кімді көздегенін айтты
АҚШ президенті Дональд Трамп қатысқан іс-шарада оқ жаудырған күдікті америкалық лидер әкімшілігінің шенеуніктерін көздегенін айтты. Бұл туралы CBS News телеарнасында мәлім болды, - деп хабарлайды Tengrinews.kz тілшісі.
"Оқ жаудырған күдікті... ұсталғаннан кейін құқық қорғау органдарына Трамп әкімшілігінің шенеуніктеріне оқ атқысы келгенін айтқан", - делінген телеарна материалында.
Құқық қорғау органдарындағы тағы бір дереккөздің айтуынша, күдікті өзінің нысанасы нақты Трамп болғанын нақтыламаған, тек "әкімшілік шенеуніктері" екенін атап өткен.
Вашингтонда Дональд Трамптың қатысуымен өткен Ақ үй тілшілерінің кешкі асында оқ жаудырған адам Калифорния штатынан келген 31 жастағы Коул Аллен болып шықты.
Ер адам - Торранс (Калифорния) қаласының мұғалімі. LinkedIn желісіндегі мәліметтерге сәйкес, Аллен 2017 жылы Калифорния технологиялық институтын машина жасау саласы бойынша бакалавр дәрежесін тәмамдаған, ал былтыр Домингес-Хиллз атындағы Калифорния мемлекеттік университетінде компьютерлік ғылымдар магистрі дәрежесін алған.
Федералдық сайлау комиссиясының мәліметінше, ол 2024 жылғы қазанда Камала Харристің президенттік науқанына 25 доллар қайырымдылық жасаған.
Билік бұл оқиғаға басқа ешкімнің қатысы жоқ деп есептейді. Полиция күдікті Washington Hilton қонақүйінің қонағы болған деген нұсқаны алға тартты. Алленнің көршісі ер адамның психикалық ауытқуы бар болуы мүмкін екенін айтты.
Күдікті сенбіде кешке Вашингтондағы Washington Hilton қонақүйінде Трамп, АҚШ-тың бірінші ханымы Мелания Трамп, сондай-ақ, вице-президент Джей Ди Вэнс қатысқан журналистердің кешкі асына кіреберісте ұсталды. Трамптың айтуынша, оқ атқан адам қауіпсіздік қызметінің офицерін жаралап үлгерген.