Лос-Анджелес маңын жайлаған орман өртінен қаза болғандар бес адамға жетті деп хабарлады жергілікті билік. Орман өрті Голливуд төбешігіне де жеткен. Ол жақта да эвакуация басталды деді Лос-Анджелес округының шерифі Роберт Луна.
Оның сөзінше, өрт әзірге оқшауланбаған. Қаза болғандар артуы мүмкін. Жағдайды қатты жел мен құрғақ ауа райы ушықтырып отыр дейді ол.
Лос-Анджелес маңында бес жерде орман өртеніп жатыр, эвакуация аумағында 150 мың адам тұрады.
Ең ірісі Пасифик-Палисейдс ауданында - Санта-Моника мен Малибу арасындағы өрт аумағы 60 шаршы шақырымнан асады.
Лос-Анджелес округының өрт күзетінің бастығы Энтони Марроне өрт мыңға жуық құрылысты жалмап-жайпағанын айтты.
Лос-Анджелес округының батысындағы Малибуде көп танымал тұлғаның үйі бар. Сәрсенбі күні TMZ басылымы Малибу жағажайында актриса әрі әнші Пэрис Хилтонның үйі де толық өртеніп кеткенін жазды.
Хилтонның өзі кейін мұны растады.
"Жүрегім қан жылайды, сөзбен жеткізу мүмкін емес. Отбасыммен жаңалықтарды көріп отырып, тікелей эфирде Малибудегі үйіміздің өртеніп кеткенін көруді ешқашан ешкімге жазбасын. Ол үймен көп жақсы кезеңдер байланысты еді" деп жазды ол Instagram-да.
Америка ақпарат құралдары Лос-Анджелесте өзге де танымал тұлғалардың үйлері өртеніп кеткенін жазды.
Лос-Анджелес әкімшілігі өрт су құбыры жүйесін бүлдіруі мүмкін деп ескертіп, тұрғындарды көбірек су алып алуға үндеді. Қала мэрі Карен Басс қаланы қалың түтін басқанын айтып, азаматтарға есік пен терезені жауып, үйде отыруға, сыртқа шыққанда маска тағуға кеңес берді.
АҚШ-тың қайта сайланған президенті Дональд Трамп Truth желісінде өртке Калифорния штатының губернаторы демократ Гэвин Ньюсомды кінәлады. Ол бұған дейін штатта су ресурсын үйлестіру жобасынан бас тартқан. Ньюсомның пікірінше, жоба жергілікті су қоймаларындағы тіршілік иелеріне қатер төндіреді. Ал Трамптың ойынша, жоба өрт сөндіруге керек сумен қамтамасыз еткен болар еді.
J.P. Morgan қаржы компаниясының бағалауынша, өрттен келген шығын 10 млрд долларға жетуі мүмкін.
Лос-Анджелес маңында орман өрті 7 қаңтарда басталған. Өрт сөндірушілер тек бір жердегі өртті ғана оқшаулай алған. Қалған аумақтардағы өрт жылдам жайылып жатыр. Лос-Анджелес шоғырланған Оңтүстік Калифорнияда мамырдан бері нәбәрі 2,5 мм жаңбыр жауған.
