Израиль Газа секторының оңтүстігіндегі Әл-Масауи жағалауындағы босқындар лагеріне әуеден шабуыл жасап, кемі 11 адам қаза тапты. Қаза болғандардың арасында Газа секторының ХАМАС ұйымы ( АҚШ, ЕО және Израиль террорлық ұйым деп таныған) тағайындаған полиция басшысы, үш бала және екі әйел бар. Бұл туралы сектордағы ХАМАС басқаратын денсаулық министрлігіне сілтеп, ВВС сайты хабарлады.
Газа секторын бақылап отырған ХАМАС жасақтаған ішкі істер министрлігі полиция басшысы Махмуд Салах пен оның көмекшісі Хусам Шахванның өлімін "қастандық" деп атады.
Израиль әскері шабуылда ХАМАС-тың полиция басшыларын "нысанаға алғанын" айтады.
Израиль Әл-Масауи жағалауын "гуманитарлық аймақ" деп белгілеп, соғыстан қашқан палестиналықтар тұратын жер деп анықтаған. Бірақ Израиль бұл жерде ХАМАС әскерилер тығылып жатыр деп бірнеше рет шабуылдаған. Қыс түсіп, күннің суытқаны бұл лагерьдегі жағдайды қиындатып жіберді дейді ВВС сайты.
2023 жылы 7 қазанда ХАМАС содырлары Израильге күтпеген жерден шабуыл жасап, адамдарды өлтіріп, 253 адамды тұтқынға алып кеткен. Осыдан соң Израиль ХАМАС-қа қарсы соғыс ашып, қақтығыс әлі жалғасып жатыр. Газадағы денсаулық сақтау министрлігі секторда 40 мыңнан аса бейбіт тұрғын қаза тапқанын, мыңдаған адам босып кеткенін айтады.
